ШҚО-да жыл басынан бері 200-ге жуық адам интернеттегі алаяқтардың құрығына түскен
ӨСКЕМЕН. KAZINFORM – Шығыс Қазақстан облысында алаяқтар 1414 нөмірінен жалған хабарлама жіберіп, халықты алдап жатыр.
ШҚО Полиция департаменті баспасөз қызметінің мәліметіне сүйенсек, өңір бойынша интернеттегі алаяқтарға алданған адам саны күннен-күнге артып барады. Жыл басынан бері облыста 200-ге жуық адам зардап шеккен.
- Алаяқтар халықтың жеке деректеріне және банктегі шоттарына қол жеткізу үшін түрлі айла-тәсілдерді қолданады. Соның бірі – 1414 нөмірінен келген жалған хабарламалар. Бұл нөмір негізінен eGov.kz біріңғай порталына тиесілі. Алайда алаяқтар техникалық әдістер арқылы осы нөмірді пайдаланып, адамдардың жеке мәліметтерін алдап алуға немесе телефонға зиянды бағдарламалар орнатуға тырысады. Сол үшін хабарламаларға бірден жауап бермей, басқа нөмір арқылы eGov.kz порталына қоңырау шалып, оның рас-өтірігіне көз жеткізіңіз, - дейді ШҚО ПД киберқылмысқа қарсы іс-қимыл басқармасының бастығы Дархан Қамалханов.
Сондай-ақ соңғы уақытта интернетте «тез байып кетесіз» деген инвестициялық ұсыныстар көбейді. Алаяқтар қысқа мерзімде көп ақша табуға көмектесетінін айтып, жалған инвестициялық жобаларға ақша салуға көндіреді.
- Тағы бір кең таралған әдіс – банктің қауіпсіздік қызметі атынан қоңырау шалу. Бұл жағдайда алаяқтар сіздің банктік шотыңызда күдікті операциялар болып жатқанын айтып, шұғыл түрде карта мәліметтерін немесе SMS-кодты сұрайды. Әсіресе, мерекелер алдында интернет-дүкендер арқылы жасалатын алаяқтық белсенді түрде артады. Мысалы, Халықаралық әйелдер күні қарсаңында алаяқтар гүлдер мен сыйлықтар сататын жалған сайттар ашады. Олар алдын ала төлем жасауды сұрап, кейін тапсырысты орындамай қояды. Кейбір жағдайларда, тапсырысты жеткізу туралы хабарлама жіберіп, оны растау үшін арнайы код сұрайды. Бұл код арқылы олар сіздің жеке мәліметтеріңізге қол жеткізуі мүмкін, - дейді Д.Қамалханов.
Еске салсақ, бұған дейін алаяқтық жасады деп айыпталған 620 Қытай азаматы еліне қайтарылғаны хабарланған.
