ШҚО-дағы екі тасжолда бүгіннен бастап қыс соңына дейін көлік қозғалысы шектелді

Шығыс Қазақстан облысындағы екі тасжолда бүгіннен бастап қыс мезгілінің соңына дейін көлік қозғалысы шектеу қойылды, деп хабарлайды Кazinform. 

ШҚО Төтенше жағдайлар департаменті баспасөз қызметінің мәліметіне сүйенсек, 30 қазаннан бастап қыс мезгілінің соңына дейін республикалық маңызы бар «Өскемен-Алтай-Үлкен Нарын-Катонқарағай-Рахман қайнары» тасжолында көлік қозғалысы шектелді.

«Аталған тасжолдың 46-66 шақырымында тіркемесі және жартылай тіркемесі бар жүк көліктерінің қозғалысына тыйым салынды. Сондай-ақ бүгіннен бастап түнгі сағат 21:00-ден 06:00-ге дейін облыстық маңыздағы «Өскемен-Риддер» тасжолының 94-104 шақырымында да дәл осындай шектеу қойылды», - делінген ақпаратта.

Осы ретте, құтқарушылар облыс жұртшылығына ауа райы нашарлаған кезде тасжолдарда барынша абай болуға шақырды.

«Қауіпсіз жылдамдықты сақтауларыңызды және ҚР Жол жүрісі қағидаларының талаптарын бұзбауларыңызды сұраймыз», - деп ескертті ТЖД-дан.