ШҚО-дағы түрмеде дәрігерлерге негізсіз төлемдер жасалған – прокуратура

ӨСКЕМЕН. KAZINFORM – Шығыс Қазақстан облысы Шемонаиха ауданында прокуратура қызметкерлері түрмеде дәрігерлерге негізсіз төлемдер жасалғанын анықтады. 

Аудан прокуратурасы ШҚО бойынша ҚАЖ департаментінің № 18 түзету мекемесіне тексеру жүргізді. Соның барысында сотталғандарға медициналық қызмет көрсету жұмыстарының негізсіз көбейтіліп көрсетілгендігі белгілі болды.

— Мәселег, хирург мекемеге жоспарлы сапары кезінде 15 сотталғанды тексерген. Алайда есептік құжаттарда қабылдауда 160 адамның болғаны көрсетілген. Осы деректер негізінде дәрігерге 214 мың теңге мөлшерінде жалақы есептелген. Алайда бекітілген нормативтерге сәйкес, 15 науқасты қабылдағаны үшін төленетін сома 15 252 теңгені құрауы тиіс еді, — делінген ақпаратта.

Дәл осындай жағдай дерматовенеролог, нарколог, невропатолог және психиатр дәрігерлерінің қабылдауларында да болды. Осылайша, дәрігерлерге артық төленген ақшаның жалпы мөлшері 1,4 млн теңгені құрады.

— Прокурорлық қадағалау актісі негізінде заңсыз төленген қаржы бюджетке қайтарылды. Ал кінәлі тұлғалар тәртіптік жауапкершілікке тартылды, - делінген хабарламада. 

Еске салсақ, бұған дейін «Бипек-Авто» ісі бойынша сот үкімі шыққаны хабарланған.