ШҚО-ға «Еңбек» бағдарламасы бойынша 6 мыңға жуық адам қоныс аударған
ШҚО Ақпарат орталығының мәліметіне сүйенсек, 2017-2021 жылдары квота бойынша өңірге 5970 адам келген. Ерікті қоныс аударушыларға жалпы сомасы 1,4 млрд теңге субсидия төленді.
«Еңбек» бағдарламасын іске асыру басқа мемлекеттік даму бағдарламаларымен бірге еңбек және жұмыспен қамту нарығына оң пайдасын тигізді. Жұмыссыздық деңгейін төмендетіп, қажетті мамандарды жұмыспен қамтыды. Биылдан бастап жұмыссыздарды азайту үшін «Қуатты өңірлер – ел дамуының драйвері» жаңа ұлттық жобасы қолға алынған. Сондай-ақ кәсіпкерлікті дамытудың 2021-2025 жылдарға арналған жобасы іске асырылады», - делінген хабарламада.
Осы жылы қаржыландырудың барлық көздерінен халықты жұмыспен қамту жөніндегі іс-шараларды іске асыруға 6,7 млрд теңге жұмылдырылған.
«Бағдарламамен тек жастарды ғана емес, аға буын өкілдерін қамту үшін биыл «Күміс жас» жаңа жобасы әзірленді. Ондағы мақсат - зейнет жасына жақын адамдар үшін субсидияланатын жұмыс орындарын құру. 1 қатысушыға берілетін субсидия 91 890 теңгені құрайды. Биыл осы бағдарламамен 530 адамды қамту көзделіп отыр. 584 млн теңгеге бюджеттік өтінім дайындалды», - делінген ақпаратта.