ШҚО-ны басқарған Ермек Көшербаев несімен есте қалды
ӨСКЕМЕН. KAZINFORM – Ермек Көшербаев Шығыс Қазақстан облысының әкімі болып 2023 жылдың 16 маусымында тағайындалды. Осы қызметте 1 жыл 8 ай ғана жұмыс істеді.
Оның бұл уақыт ішінде несімен есте қалғанын Kazinform тілшісі сараптап көрді. Ермек Көшербаев облысты басқарып тұрғандағы елеулі оқиғалар да еске алынды.
Ермек Беделбайұлы 1965 жылы Алматы қаласында туған. Еңбек жолын 1988 жылы ҚазССР Сыртқы істер министрлігінің құпия іс қағаздарын жүргізу бойынша аға инспекторы болып бастаған. Шығыс Қазақстанға әкім болардың алдында Қазақстан Республикасының Ресей Федерациясындағы Төтенше және Өкілетті Елшісі болып қызмет етті. Осылайша, өз тәжірибесінде алғаш рет облысқа әкім болып тағайындалды.
Апат айтып келмейді
Осы бір жарым жылдан астам уақыт ішінде облыста түрлі апаттар болды. Бұрынғы әкім Даниал Ахметов ірі апат болмаса ұсағына бара бермейтін. Ал Ермек Көшербаев өңірдің әр ауданында болып жатқан түрлі апаттарға өзі жедел барып отырды. Біреулер бұны қолдаса, кейбірі құптамай жатты. Мәселен, ең әуелі 2023 жылы қазан айында Зайсанда бірқабатты қоғамдық моншада жылыту қазандығы жарылып, 1 адам қаза болғанда ол сол жерге түн жарымында аттанған.
2024 жылы 31 тамызда Глубокое ауданындағы KAZ Minerals компаниясына қарасты «Ертіс» шахтасында газдан уланып қалған 4 адам көз жұмғанда Ермек Көшербаев марқұмдардың отбасыларына барып, көңіл айтып, қажетті көмек көрсетті. Былтыр 21 желтоқсанда таңғы сағат 4:39-да Риддердегі жылу электр орталығында жарылыс болып, 6 адам зардап шеккенде сол жерге табан тіреп, жағдайды бақылауға алған.
Басқа облыс тұрғындары «әкім болған соң баруға міндетті емес пе?» деп пікір білдіріп жатса, ШҚО-ны 9 жыл басқарған Даниал Ахметовтен кейін шығысқазақстандықтарға бұл да жаңалық болып көрінгені рас.
Жолдың «жыры»
2023 жылдың қараша айында Орталық коммуникациялар қызметінде өткен баспасөз мәслихатында Ермек Көшербаев 2024 жыл облыста Жол жылы деп жарияланғанын мәлімдеген еді. Себебі өңір халқын толғандырған өзекті мәселелердің ішінде жолдың жайы алдыңғы лекте тұр. Шұрық тесік жолдардан бір жерден екінші жерге жету мұң. Туристердің де сулы да нулы өлкеге көп ат ізін сала бермейтіні де сондықтан болар.
Әкімдік жылды қорытындылағанда 600 шақырым жолдың жөнделгенін мәлім етті. Десе де ел арасында жолға шағымданатындар әлі де толастамады. Өңір бойынша әлі асфальттың бетін көрмеген 79 ауыл бар. Тау үстіндегі ирелең жол - Осинов асуын қайта жаңғырту жұмысы 8 жыл бұрын басталса да сол күйі аяқталмай келеді. Өскемен мен Риддер арасындағы жаңа жол құрылысы да созбалаңға салынып кеткен.
Көптен күткен көпір
ШҚО-ның жеті ауданы – Күршім, Марқакөл, Зайсан, Тарбағатай, Алтай, Үлкен Нарын мен Катонқарағай халқы 60 жыл бойы күткен Бұқтырма су қоймасы арқылы өтетін көпір былтыр қазан айында ашылды. Оның құрылысы Даниал Ахметовтың тұсында Президенттің пәрменімен басталып, Ермек Көшербаев облысты басқарып тұрғанда аяқталды. Ұзындығы 1 316 метрді құрайтын көпір тәулігіне 80 мың автокөлікті өткізе алады.
Ушыққан экология мәселесі
2024 жылдың қараша айында Өскемен тұрғындары ауа сапасының күрт нашарлап кеткеніне қайта-қайта шағымдана бастады. Жел соқпай, қолайсыз метеорологиялық жағдай қалыптасты. Қаланы қою түтін тұмшалап алып, ауруханаға ем іздеп келгендер саны күрт көбейді. 28-29 қараша күндері алғаш рет экологиялық жағдайға байланысты оқушылар онлайн форматқа ауыстырылды. Содан соң тарихта бірінші рет 4 адамға «тамақтың химиялық күйігі» диагнозы қойылды.
«Қазгидромет» РМК жүргізген мониторинг нәтижесінде зиянды шығарындылардың рұқсат етілген шектен асып кету фактісі тіркелді. Жыл басынан бері өңір экологтары ауаны ластаған кәсіпорындарға 2,2 млрд теңге айыппұл салған. ШҚО әкімі Ермек Көшербаев Өскеменде экология жағдайын жақсарту үшін арнайы ұйым құрылатындығын мәлім етті.
– Кейбір кәсіпорындар әр түрлі сылтау айтып, қолайсыз метеорологиялық жағдай күндері өз ғимараттарына қажетті өлшеу жұмыстарын жүргізу үшін кіргізбей жатады. Егер кәсіпорындар арадағы келісілген талаптарды орындап отырған болса, онда рұқсат берер еді. Тексеруден қашса, демек жасыратын нәрселері бар, - деді ол.
2025 жылдың 10 қаңтарында «Өскемен тынысы» экологиялық қорғау бюросы ресми түрде өз жұмысын бастады. Енді бюро мүшелері өнеркәсіптік нысандарға тексеріс жұмыстарына қатыстып, қаладағы ауа сапасын жақсарту үшін түрлі жобаларды қолға алып жатыр.
Ұлттық спорт және домбыра
Ермек Көшербаевтың тұсында Шығыс Қазақстанда ұлттық спорт қайта жандана түсті. Бұрын мүлде кенжелеп қалды деуге келмес. Десе де осы 1 жыл 8 айдың ішінде қазақтың көнеден келе жатқан спорт түрлері бойынша түрлі додалар жиірек ұйымдастырылды. Зайсанда халықтық спорт ойындары өтсе, Ұлан ауданының Бозанбай ауылында орналасқан Бүркіт төбе алаңында халықаралық «Шығыс Салбурыны» бүркітшілер фестивалі бұрынғыға қарағанда әлдеқайда ауқымды қылып өткізілді. Тіпті 20 жыл бойы ат дүбірін естімеген Риддер қаласында ұлттық спорт түрлерінен сайыс өтіп, халық қиқулап, бір серпіліп қалды.
Тағы бір айта кетерлігі, әкім осындай ұлттық форматтағы шараларда қолына домбыра алып, күмбірлетіп күй шертіп тұратын.
@ne_habar ШҚО әкімі тұрғындарды қолдап, Өскемендегі Қайсенов пен Әуезов көшелеріндегі бұрылыс мәселесін шешті. #шқо #өскемен #вко ♬ оригинальный звук - Ne_habar
Бұл да жұрттың көңілін сүйсінтіп жатты.
P.S. 1 жыл 8 ай нақты баға беру үшін аз уақыт. Десе де Ермек Көшербаев шығысқазақстандықтардың есінде қалары анық.
Еске салсақ, Даниал Ахметов ШҚО әкімі лауазымынан босатылғанда оның несімен есте қалғаны жайлы жазған болатынбыз.
