ШҚО оқушылары ЭКСПО-2017 көрмесіне барады

ӨСКЕМЕН. ҚазАқпарат - Өскемен қаласындағы Назарбаев зияткерлік мектебінде өңірдегі 5-6 сынып оқушыларына, олардың ата-анасы мен ұстаздарына арналған Ашық есік күндері өтті. Қайырымдылық жәрмеңкесі барысында жиналған қаражатқа байқау жеңімпаздары ЭКСПО-2017 көрмесіне баратын болды, деп хабарлады ҚазАқпарат тілшісі.

Ашық есік күндерімен қатар Назарбаев зияткерлік мектебінде өңір мектептерінен келген жоғары сынып оқушылары арасында зияткерлік байқау өтті. Жоғары ұпай жинағандар EXPO-2017 сертификатына ие болды.


Нәтижесінде, Ново-Ахмирово, Глубокое және Белоусовка ауылдарынан келген оқушылар - Жанерке Сапарғалиева, Аяулым Жанатова, Аймөлдір Мәдетхан, Ульяна Пономарева және Кәусар Идиятқызы жеңімпаз атанды.

«Мен халықаралық көрмеге баратыныма, ондағы лагерьде жаңа достар табатыныма қатты қуанып тұрмын», - деді Глубокое ауылындағы О.Бөкей мектебінің 10-сынып оқушысы А.Жанатова.


«Мен EXPO-2017 көрмесіне баратыныма әлі де сене алар емеспін. Осындай мүмкіндік берген барлық ұйымдастырушыларға алғысым шексіз», - деді Белоусовка ауылының №1 мектебінің оқушысы Ульяна Пономарева.