ШҚО тұрғынынан 1 тоннадан астам балық тәркіленді
ӨСКЕМЕН. ҚазАқпарат – Өскемен қаласының полицейлері жергілікті тұрғынның көлігінен заңсыз ауланған мың келіден астам балық тәркіледі, деп хабарлайды ҚазАқпарат.
Қалалық Полиция басқармасы баспасөз қызметінің мәліметіне сүйенсек, «Құқықтық тәртіп» жедел алдын алу шарасы барысында қалаға кіреберістегі Шешек асуы тұсында «Газ-3302» маркалы автокөлік тоқтатылған. Тексеру барысында жүргізушінің балықты тиісті құжатсыз тасымалдағаны анықталды.
«Ер адамның айтуынша, ол бұл балықты Күршім ауылында белгісіз біреулерден сатып алған. Балықтың жалпы салмағы 1 182 келі», - деп хабарлады ведомство өкілдері.
Қазіргі уақытта жүргізушіге қатысты ҚР ӘҚБтК-нің 389-бабы бойынша тергеу амалдары жүргізіліп жатыр.
