Шорт-трекші Глеб Ивченкоға пәтер кілті табысталды
РУДНЫЙ. KAZINFORM — Ұлыстың ұлы мерекесінде Рудный қаласының ондаған тұрғыны жаңа пәтердің кілтін алды.
Қала тұрғындары мен қонақтары Наурыз мерекесін Орталық алаңда кең көлемде атап өтті.
Қысқы Азия ойындарында шорт-тректен тарихи жеңіске жетіп, Қазақстан қоржынына алтын медаль салған ұлттық құраманың басты ойыншыларының бірі Глеб Ивченко да жерлестерінің мерекелік шарасына қатысты. Астанада жарыста жүрген спортшы LED экран арқылы байланысқа шығып, тілек білдірді. Сондай-ақ осы тұста чемпионның анасы Анна Ивченкоға пәтер кілті салтанатты түрде табысталды.
— Рудныйлық спортшы осындай жетістікке жеткенде, оны қолдап, марапаттау — біздің міндетіміз деп санаймын. Наурыз — жарқын әрі шынайы мейірімді мерекеміз баршамызға құтты болсын! Қала тұрғындарының бізді жақсы қабылдап, әр үйдің пайдалануға берілуіне бірге қуанатыны — керемет қасиет, біз үшін зор мәртебе, — деді QC HOLDING құрылтайшысы Нұралхан Кульчиков.
Глеб Ивченкоға пәтер «Әлихан» тұрғын үй кешенінен берілді. Бұл тұрғын үй кешені Рудныйдың ең жаңа әрі болашағы зор ауданында орналасқан. Үй қызыл кірпіштен салынған. Ауласында толық инфрақұрылым қарастырылған: балалар алаңы, абаттандырылған демалыс аймақтары, тәулік бойы жүргізілетін бейнебақылау, автотұрақ және басқасы.
Бұл күні жаңа пәтер кілттерін тек спортшы ғана емес, баспана кезегінде тұрған тағы 25 азамат алды.
Айта кетсек, Рудный қаласында жыл басынан бері алты көпқабатты үй салынып, пайдалануға берілді.
Бұған дейін Рудныйда салмағы 6 келіге жуық алып сәби дүниеге келгенін жазған едік.
