Шорт-тректен ӘЧ: Денис Никиша финалға жолдама алды

АСТАНА. KAZINFORM — Бейжің қаласында шорт-тректен өтіп жатқан әлем чемпионатында қазақстандық Денис Никиша финалға шықты.

Қазақстандық спортшы 500 метр қашықтықта сәтті өнер көрсетті.

Денис ширек финалда өз тобында мәре сызығын бірінші болып қиды. Ал жартылай финалда канадалық Стивен Дюбуаны ғана алға жіберді.

Осылайша, Д. Никиша А финалында жүлделі орындар үшін таласуға мүмкіндік алды.

Тағы бір қазақстандық Абзал Әжіғалиев осы қашықтықта ширек финалдан аса алмады.

Денис Никиша өткен жылы Роттердамда өткен әлем біріншілігінде 500 метрден қазақстандықтар арасында алғаш рет тарихи күміс жүлдеге қол жеткізген еді. 

Еске сала кетейік, бұдан бұрын Денис Никишаның шорт-тректен әлем чемпионатының күміс жүлдегері атанғанын жазған болатынбыз.