Швецияда мұғалімдер ата-аналар тарапынан қысым болып жатқанын хабарлады

АСТАНА. KAZINFORM — Швецияның кейбір мектептерінде ата-аналар мұғалімдермен кездесуге заңгерлерді тарта бастады, бұл мұғалімдердің алаңдаушылығын тудырып отыр, деп хабарлайды АЗЕРТАДЖ.

Отбасылық заңгерлер ата-аналарды бағаларға, оқыту әдістеріне немесе мектеп әрекеттеріне қарсылық білдіру үшін жиналыстарға шақырады. Кейде олар күтпеген жерден сыныпқа кіріп келеді, мұны мұғалімдер қысым ретінде қабылдайды.

Стокгольмдегі Sveriges Lärare (Швед мұғалімі) кәсіподақ ұйымының төрағасы Брит-Мари Селин мұндай жағдайлар мұғалімдердің кәсібилігіне қауіп төндіретінін атап өтті.

Педагогтардың пікірінше, бұл қысым олардың жүктемесін арттырады, бұл сыныптың қалған бөлігіне теріс әсер етуі мүмкін.

«Уақыт мұғалімнің сабақ берумен айналысуының орнына, негізсіз талаптарды қанағаттандыру үшін босқа кетеді», - деп түсіндірді B-M. Селин.

Кәсіподақ өз баяндамаларында заңгерлерді тартумен қатар, ата-аналар баспасөзге барамыз, мектеп инспекциясына шағым түсіреміз немесе әлеуметтік желілерде мұғалімдердің теріс қылығын көрсетеміз деп қорқытып жатқанын жазады. Мұғалімдер мұндай үрдіс мектептерге жаңа кадрларды тартуды қиындатып, ұстаздардың беделіне нұқсан келтіреді деп қауіптенеді.

Кәсіподақ бұл тәжірибенің оқу үдерісіне кері әсерін тигізетінін және білім беру жүйесі деңгейінде талқылауды қажет ететінін алға тартады.

Бұған дейін Швецияда немере баққан ата-әжелерге ақша төленетінін жазғанбыз.