Шығыс Қазақстан облысына Сыр күріші жөнелтілді

ҚЫЗЫЛОРДА. Маусымның 21-і. ҚазАқпарат /Руслан Игілік/ - Сыр бойындағы күріш өсіруші шаруашылықтардың жетекшілері үстіміздегі жылдың қыс және көктем айларында орын алған тасқын судың салдарынан Шығыс Қазақстан облысының тұрғындарына қамқор қолын созды.

Олар арнайы бастама көтеріп, сондағы зардап шеккен отбасыларға 64 тонна ақ күріш жіберуге шешім қабылдады.

Соның ішінде Сырдария ауданынан «Алуан Ас» ЖШС бас­шысы Марат Бисенов пен Қазалы ауданынан «РЗА» АҚ президенті Самұрат Имандосов 20 тонна­дан, Жалағаш ауданы «Қызылорда­Агросервис» ЖШС директоры Шәріпбай Күшімбаев 10 тонна және Қазалы ауданы, «Сыр маржаны» ЖШС басшысы Мінажадин Өтеев 2 тонна күріш берген. Сонымен қатар, «Даму Агро­Қызылорда» қоры 12 тонна Сыр маржанын жөнелтті. Кеше шығыстағы ағайын­ның хал-жағдайын біліп қайтуға жасақталған арнайы делегация жолға шықты.