Шығыс Қазақстанда шағын футболдан әуесқойлар ойындары өтуде

АСТАНА. ҚазАқпарат - Шығыс Қазақстан облысында «EXPO-2017» көрмесіне орайластырылып әуесқой командалар арасында шағын футбол ойындары өтуде, деп хабарлайды ҚазАқпарат ШҚО Дене шынықтыру және спорт басқармасының баспасөз қызметіне сілтеме жасап.

«16 сәуірде басталған жарыстың бірінші айналымының шешуші ойындары өтуде. Командалар жоғары және бірінші лига болып екі топқа бөлінген. Жоғары лигада 8 команда ойнаса, бірінші лига құрамында - 10 команда. Жарысқа 450-ге жуық спортшы қатысуда», - делінген таратылған хабарламада.

Айта кету керек, жоғары лигада жақсы ойын көрсетіп, көзге түскен «СМУ-Алтай» және «Батыр» командалары алда келе жатыр. Бірінші лигадан «Қайрат» командасы алдыңғы қатардан көрінуде.

Бұған қоса, жуықта Астана күніне орай мүмкіндігі шектеулі жандар арасында футболдан Біріншілік өтті. Нәтижесінде, «Өскемен-1» командасы - І орын, «Семей» командасы - ІІ орын, «Өскемен-2» командасы ІІІ орын алды. Жеңімпаздар мақтау қағаздарымен, медальдармен және ақшалай сыйлықтармен марапатталды.