Шымкент қаласында полицейлер аса ірі көлемдегі ақша ұрлығын ашты
Оқиға орнына келген Әл-Фараби ПБ-нің жедел тергеу тобы белгісіз тұлғалар құрылыс дүкеніне кіріп, 50 миллион теңге ақшасын ұрлап кеткенін анықтады, деп хабарлайды ҚазАқпарат ОҚО ІІД Мемлекеттік тіл және ақпарат басқармасына сілтеме жасап.
. Аталған жайт ҚР ҚК-нің 188 бабы «Ұрлық» бойынша Шымкент ҚІІБ Әл-Фараби ПБ СДТБТ-не тіркелді. Осы қылмысты ашу мақсатында полиция бөлімінің тәжірибелі қызметкерлерінен жедел тергеу тобы жасақталды.
Әл-Фараби ПБ жедел із кесушілері шұғыл іздестіру іс-шараларының барысында 5 күдікті азаматтың 3-уін ұстады. Олардың барлығы да Шымкент қаласының 1994, 1992 және 1989 ж.т. тұрғындары. Ұсталғандардың бірі дүкеннің жұмысшысы болып шықты. Айғақты зат ретінде 8 000 000 теңге ұрланған ақшаның бір бөлігі мен күдіктілердің қылмыс жасаған автокөлігі тәркіленіп алынды. Ақша заңды иесіне қайтарылды.
Қазіргі таңда полицейлер оқиғаның орын алу барысын анықтады. Күдіктілер қамауда. Сотқа дейінгі тергеу амалдары жүргізілуде. Жедел із кесушілер қылмыс жасаған қалған күдіктілерді іздестіруде. 