Шымкентте алғаш рет тізе буынын ауыстыру операциясы жасалды
«Біздің шақыруымызбен Мәскеуден екі дәрігер келді. Олар біздің хирургтерімізбен бірігіп операциялар жасайды. Алдағы уақытта мұндай операцияларды біздің дәрігерлер өздері өткізе алады», - деді ОКА бас дәрігері Мұқан Егізбаев.
Екі күн ішінде 4 операция жасау жоспарлануда. Облыстық ауруханада буындарды жасандыға ауыстыру қолданып отыр. «Бірнеше жыл бойы біз сан-жамбас буынын қайта отырғызумен айналысып жүрміз. Биылғы жылдың өзінде-ақ мұндай операциялардың жүзден астамы өткізілді. Ал тізе буынына операция жасауды алғаш рет жүргіздік», - деп түсіндірді М. Егізбаев.
Бұдан басқа, жақын күндері аурухана қабырғасында бірегей операция өткізілді. Ультрадыбыстық лазер арқылы 45 жастағы емделуші бауырының 60 %-ы алып тасталынды. Операцияны медицина ғылымдарының докторы, профессор Болат Баймаханов жүргізді.