Шымкентте көркем гимнастикадан халықаралық турнир басталды
Бүгінгі жарысқа Израиль, Қырғызстан, Ресей, Беларусь, Өзбекстан, Жапония, Вьетнам және Қазақстан құрамасының 100-ге жуық спортшылары екі жас ерекшелігі бойынша көпсайыс түрінен сайысқа түседі.
Спорттық шараның ашылу салтанатына қатысқан Оңтүстік Қазақстан облысының әкімі Жансейіт Түймебаев барша турнирге қатысушы спортшыларға қош келдіңіздер дей отырып, жас спортшыларға сәттілік тіледі.
«Еліміздің мақтанышы Әлия Юсупова көркем гимнастикадан Азия ойындарының екі дүркін абсолютті жеңімпазы. Афины және Бейжің қалаларында өткен жазғы Олимпиада ойындарында ел намысын абыроймен қорғаған. Бүгінде көркем гимнастикадан ҚР бас жаттықтырушысы қызметін абыроймен атқарып келе жатқан спорт саласының бірегей білікті маманы»,-деді әкім.
Әлия Мақсұтқызы басқаратын көркем гимнастика мектебінің ашылғанына небәрі 7 жыл ғана болғанына қарамастан спортшылары бірнеше биіктіктерді бағындырып үлгерді. Былтырғы жылы Бразилияда өткен 31-ші жазғы Олимпиада ойындарында Әлияның төл шәкірті Сәбина Әшірбаева небәрі 16 жасында өнер көрсетіп, жоғары көрсеткіштерге ие болды.
Айта кетейік, бүгінгі таңда, облыстық көркем гимнастика спорт мектебінде 39 жаттықтырушы 289 балаға оқу-жаттығу жұмыстарын жүргізуде.
