Сингапурлық басылым: DeepSeek-ті пайдалануға тыйым салғандардың қатары өсіп келеді
АСТАНА.KAZINFORM – Жапонияның Toyota, Mitsubishi және SoftBank бастаған компаниялары мен Оңтүстік Кореяның Сеул Ұлттық университеті қытайлық генеративті жасанды интеллект өнімі – DeepSeek-ті пайдалануға тиым салды. Бұл туралы сингапурлық «Lianhe Zaobao» басылымы хабарлады.
Басылымның жазуынша, тиісті ақпараттар мен деректердің Қытай үкіметіне қолды болу қаупіне байланысты DeepSeek-ті пайдалануға тыйым салған жапониялық компаниялардың саны көбейіп келеді.
— Ақпараттық қауіпсіздік тұрғысынан алаңдаушылық тудырғандықтан (қызметкерлеріміздің) пайдалануына тыйым салдық, - деп түсіндірді Toyota өкілі.
Ал Mitsubishi компаниясы қызметкерлер тарапынан жұмыста DeepSeek-ті пайдалану туралы өтініш түскенін, бірақ қазірше оған рұқсат етпейтінін мәлімдеді.
SoftBank те компания ішінде DeepSeek-ке шектеу қойып, оны операторлық терминалдарға жүктеуге тыйым салды.
Сондай-ақ Сеул ұлттық университеті де DeepSeek-ті бұғаттау туралы шешім шығарды. Шешімге сәйкес, университеттің Ақпараттандыру басқармасы бейсенбі күні (13 ақпан) таңғы сағат 9-дан бастап кампус аумағында сымды желі арқылы DeepSeek платформасына қосылуға тыйым салды.
Басқарманың мәліметінше, жеке деректерді қорғау секілді қауіпсіздік шараларының сенімділігі расталғанға дейін DeepSeek-ті пайдалануға уақытша шектеу қойылады. Егер академиялық зерттеу немесе білім беру мақсатында осы платформаны пайдалануға қажеттілік туындаса, алдын ала рұқсат алу қажет.
Басылымның атап көрсетуінше, DeepSeek нарыққа енгелі бірқатар ел мен аймақта оны пайдалануға шектеу қоятын шаралар қабылданды. Италия билігі 30 қаңтарда жеке деректердің қауіпсіздігіне байланысты DeepSeek-ті бұғаттап тастады. Тайваньның «Цифрлық даму министрлігі» 31 қаңтардан бастап мемлекеттік органдар мен маңызды инфрақұрылымдарда DeepSeek-ті пайдалануға тыйым салынғанын мәлімдеді.
Аустралия 4 ақпан күні ұлттық қауіпсіздікке байланысты үкіметтік құрылғыларда DeepSeek қызметін пайдалануға тыйым салды. Оңтүстік Кореяның бірқатар мемлекеттік органы 5 ақпаннан кейін DeepSeek-ті бұғаттай бастады.
Еске сала кетейік, бұған дейін қаңтар айында жарыққа шыққан қытайлық DeepSeek стартапының жаңа әзірлемесі ЖИ нарығын дүр сілкіндіргенін жазған едік. Қосымша іске қосылысымен санаулы сағаттарда App Store-дағы ең көп жүктелген тегін бағдарламалардың ТОП-5 тізіміне енген.
