Сирия Иорданияға наразылық нотасын тапсырды
АСТАНА. KAZINFORM — Сирия 28 қазанда Иорданияның Дамаскідегі елшісін шақырып, Иордания әскери-әуе күштерінің соққыларына байланысты ресми наразылық нотасын тапсырды. Соққылар салдарынан Сирияның оңтүстігіндегі Дераа провинциясында бейбіт тұрғындар қаза тапқан, деп жазады Анадолы.
Бұл туралы Сирия Сыртқы істер министрлігіне сілтеме жасаған SANA агенттігі хабарлады.
Сирия Сыртқы істер министрлігіне Иорданияның елшісі Суфиан әл-Куда шақырылып, азаматтық нысандарға жасалған соққыларға байланысты наразылық нотасы табысталды.
Бұл қадам Сирия мен Иордания әуе соққыларын тергеу, бейбіт тұрғындарды қорғау үшін үйлестіруді күшейту және Сирияның егемендігін құрметтеуді қамтамасыз ету мақсатында бірлескен қауіпсіздік комитетін құруға келіскеннен кейін бір күн өткен соң жасалды.
Тиісті келісім сейсенбі күні кешке Сирия Сыртқы істер министрі Асаад аш-Шибани мен оның иорданиялық әріптесі Айман ас-Сафади арасындағы телефон арқылы сөйлесу кезінде жасалған.
Ас-Сафади адам өліміне байланысты өкініш білдіріп, Сирия халқына көңіл айтты.
Оның айтуынша, әуе соққылары Иорданияға төнген нақты қауіптер мен дайындалып жатқан шабуылдар туралы барлау мәліметтеріне сүйене отырып, ДАИШ террористік ұйымының позицияларына бағытталған.
Сирия билігінің мәліметінше, дүйсенбі күні жасалған соққылар салдарынан жеті адам қаза тапқан.
Иордания үкіметінің ресми өкілі Мұхаммад әл-Мумани сейсенбі күні операция барысында «Ислам мемлекеті» ұйымының 20-дан астам содыры мен ірі қару-жарақ қоймасы жойылғанын мәлімдеді.
Иордания әскери күштерінің хабарлауынша, операция өткен жұмада елдің оңтүстігіндегі Карак провинциясында шіркеу маңында еске алу рәсіміне жиналған адамдарға жасалған шабуылға қатысы бар топтарға қарсы бағытталған. Сол шабуылдан тоғыз адам қаза тапқан.
Сирия әуе соққыларын айыптап, олардың елдің егемендігін бұзғанын және Дамаскімен алдын ала үйлестірусіз жасалғанын мәлімдеді.
Бұған дейін хабарланғандай, АҚШ соты Сирия түрмесінің бұрынғы басшысын 60 жылға соттады.
