Сирияда сайлау науқаны басталды

АСТАНА. KAZINFORM — Сирия Халық мәжілісінің Жоғарғы сайлау комитеті елдің кейбір провинциясында Халық мәжілісінің мүшелері сайлауына кандидаттар тізімін жариялап, сайлау науқанының басталғанын хабарлады. Бұл туралы Анадолы жазды.

Жоғарғы сайлау комиссиясының төрағасы Мұхаммед Таха әл-Ахмед Сирияның SANA ақпарат агенттігіне берген мәлімдемесінде, 28 қыркүйекте ел бойынша 50 сайлау округінде Халық мәжілісіне қатысуға өтініш қабылдау процесі аяқталғанын айтты.

Әл-Ахмед жарияланған тізімде кандидаттардың жалпы саны 1578 адам екенін, олардың 14%-ы әйелдер екенін және бұл көрсеткіш провинцияларға қарай әртүрлі екенін атап өтті.

Оның сөзінше, сайлау науқаны 29 қыркүйекте басталып, 3 қазан күні аяқталады.

Сайлау 5 қазан күні өтіп, өкілдік принципіне негізделген сайлау комиссиялары көмегімен жүргізіледі.

Әл-Ахмедтің хабарлауынша, дауыс беру 5 қазан, жексенбі күні сағат 09:00-де басталып, дауыстарды санау сағат 16:00-де басталады.

Сирияда азаматтық соғыс салдарынан болған қираулар, жеке куәліктердің жоқтығы, мекенжайлардың жойылуы және халықтың жартысынан астамының ел ішінде және сыртында қоныс аударуы себебінен Халық мәжілісінің сайлауы тікелей халықтық дауыс беру арқылы емес, өкілдік принципіне негізделген сайлау комиссиялары арқылы өткізіледі.

2011 жылғы халық саны туралы деректерге сәйкес, провинцияларды өкілдейтін 210 депутат кандидаттарының 140-ы сайлау комиссиялары арқылы сайланады, ал қалған депутаттар Президенттің тағайындауымен бекітіледі.

Бұдан бұрын Сирия Башар Асад құлатылғаннан кейін алғашқы парламентін құруға дайындалып жатқанын жазғанбыз.