Сирияда жағдай қайтадан ушығып барады: кім кіммен соғысып жатыр
АСТАНА. KAZINFORM – Сирияның бірқатар қаласында жағдай шиеленісіп, түрлі топтар арасында қақтығыстар жүріп жатыр. Олардың ішінде әсіресе Джабла қаласында көп қан төгілуде. Сириядағы жағдай жөнінде Kazinform агенттігі тілшісінің материалынан оқыңыздар.
Джаблада Башар Асад пен оның отбасына жақын болып табылатын алавиттер тұрады.
Сирияның жағалауға жақын Латакия мен Тартус сияқты өңірлері жаңа үкімет пен бүгінгі таңда елдің жаңа әкімшілігі саналатын «Хайят Тахрир аш-Шам» (ХТШ) тобына қарсы түрлі қарулы бірлестіктер арасындағы ірі қақтығыстардың аймағына айналып отыр.
Бүгін түн сириялықтардың үрейін тудырды
Сирияның жаңа әкімшілігі күш-қуат құрылымдарының Тартустағы алавиттердің бұрынғы режиммен байланысы бар деген себеппен жергілікті азаматтардың тұтқындалуына қарсы наразылығын басуға деген ұмтылысы тұрғындардың жаппай тәртіп бұзуына алып келді, оның арты Латакия, Тартус және Джабла қалаларында алавиттер мен жаңа әкімшіліктің күш құрылымдары арасындағы қақтығысқа ұласты.
«Хайят Тахрир аш-Шам» ұйымына қарсы әскери бірлестіктер бір мезетте олардың Латакия, Тартус және Хомстегі әкімшіліктеріне шабуылдады. Сирияның Ұлыбританияда орналасқан Адам құқықтары жөніндегі обсерваториясының (SOHR) мәліметтеріне сәйкес, қақтығыстардың салдарынан кемінде 70 адам қаза болған. Асад әкімшілігі әуе барлауының бастығы генерал-майор Ибрагим Хувейджа кепілге алынды.
Сирияның қауіпсіздік күштері кеше елдің батысында Башар Асад кезіндегі арнайы мақсаттағы бөлімше командирі Сухель әл-Хасанмен байланысты қарулы топтармен соғысқа қатысқандарын мәлімдеді.
Наразылықтарды басу және Жерорта теңізі ауданына бақылауды қайтару үшін Сирия билігі өңірге Қорғаныс министрлігінің қосымша күштерін жұмылдырған.
Бұл ретте Латакияға сапары барысында әскери колоннаны партизандар отряды оңдырмай атқылаған.
Бұл Сирия жаңа үкіметінің 2024 жылдың желтоқсанында билік басына келгелі бергі ең қанқұйлы қақтығыстарының бірі болды.
Шабуылдардың салдарынан Сирияның ұлттық әскерінің 50-ден астам сарбазы мерт болды. Қазіргі таңда өңірге елдің Қорғаныс министрлігінің 17 мыңға жуық әскері келді. Олар алавиттер мен өзге де қарулы құрылымдардың наразылығын басуға жұмылдырылды.
Кейбір шолушылар әскер қаланың кей жерлерін бей-берекет атқылап жатқанын жеткізді. Осының салдарынан олардың есебі бойынша, бейбіт тұрғындарды қоса алғанда 120-дан астам адам қаза болған. Асадты жақтаушылар аталған жағдайды ұлттық азшылықтарға жасалған күш көрсету әрекеті етіп көрсетуге ұмтылып жатыр.
Бұрынырақ алавит белсенділері бұрынғы режимнің бұғып жатқан ұйымдары бар екені, олар тұрғындарды жаппай тәртіпсіздіктерге итермелеейтіні туралы мәлімдеген еді.
Сириядағы жағдайдың ушығуы аясында ауыр бронды техникадан тұратын түрік қарулы күштерінің әскери колоннасы Идлиб қаласына бет алған.
Шолушылар Түркияның «Сирия демократиялық күштеріне» қарсы топтарға кезекті әскери операция бастауы мүмкіндігін жоққа шығармайды.
Осылайша, Сирия билігі әлеуметтік, саяси және экономикалық проблемалармен қатар ұлттық азшылықтар наразылығынан туындаған ішкі қарама-қайшылықтармен бетпе-бет келіп отыр.
Сарапшылардың бағалауынша, елдегі наразылықтарды басуға Дамск әкімшілігінің күші жетпеуі мүмкін. Өйткені оларға өңірлердегі түрлі күштер қолдау көрсетіп отыруы ықтимал.
Жалпы алғанда, Сириядағы жағдай этникалық наразылықтарды қоса алғанда күн өткен сайын шиеленісіп барады. Мұндай ішкі қайшылықтар мен қарулы қақтығыстар болашақта елдегі тұрақсыздықты одан сайын соза түсуі мүмкін.
Қазіргі таңда Сирияның Тартус пен Латакия қалаларында сағат кешкі 22:00-ден сағат 10:00-ге дейін, Хомста сағат 22:00-ден, 08:00-ге дейін коменданттық сағат енгізілді.
Осыған дейін біз Сирияның уақытша президенті елдің аумақтық тұтастығын сақтауға шақырғаны туралы жазған едік.
