Сирияда жаңа парламент құрылады

Сирия Башар Асад құлатылғаннан кейін алғашқы парламентін құруға дайындалып жатыр, деп хабарлайды АЗЕРТАДЖ.

 Бұл оның билігінен кейінгі өтпелі кезеңдегі маңызды белес болмақ.

Аймақтық комитеттер сайлау алқаларын таңдап алды. Олар 5 қазанда 210 мүшеден тұратын Халық жиналысының үштен екісін сайлайды. Қалған үштен бірін Ахмед аш-Шараа тағайындайды.

Билік бірнеше жылдық соғыстан кейін халық саны мен халықтың қоныс аудару деректері сенімді болмағандықтан, жалпыға бірдей сайлау құқығының орнына осы жүйеге жүгінгенін мәлімдеді, деп жазады Reuters.

Сайлау процесін Шараа маусым айында тағайындаған 11 мүшеден тұратын орган басқарады. Бұл орган өз кезегінде аймақтық қосалқы комитеттерді құрып, олар жергілікті кеңесулерден кейін аймақтық сайлаушылар алқасының мүшелерін іріктеді. Шамамен 6000 сайлаушыдан тұратын алдын ала тізім жарияланды. Парламентке кандидат болу үшін сайлаушылар алқасының мүшесі болып сайлану қажет.

Іріктеу критерийлері бұрынғы режимді жақтаушыларды, сондай-ақ «бөліну, ыдырау немесе шетелдік араласуға ұмтылушыларды» жоққа шығарады. 

Айта кетелік Израиль мен Сирия келіссөздердегі ілгерілеу туралы хабарлады, бірақ әлі нақты келісім жоқ.