Сицилияда торнадодан 9 адам зардап шегіп, ғимараттар қирады
АСТАНА. KAZINFORM — Италияның Сицилия аралына қуатты торнадолар соғып, танымал туристік Марсала қаласындағы ғимараттарға зақым келді. Табиғи апаттан 9 адам, оның ішінде мектеп оқушысы жарақат алды. Құйын көліктерді аударып, әуеге көтерген, деп хабарлайды БелТА.
Табиғи апат таңертең болған. Найзағай ойнап, дауыл тұрғанда жағалау маңында екі торнадо пайда болған. Оқиға куәгерлері қатты қорыққанын, бірі бұрын-соңды мұндай қорқынышты бастан өткермегенін айтып, жағдайды «нағыз бейберекетсіздік» деп сипаттады.
Жергілікті БАҚ мәліметінше, құйындардың бірі мектеп ғимаратын зақымдап, салдарынан оқушы жарақат алған. Сондай-ақ стадион маңында бірнеше көлік әуеге көтерілген.
Бұл торнадолар Сицилияның осы өңірінде соңғы бірнеше онжылдықтағы ең қуатты құйындардың бірі саналды. Жергілікті жедел медициналық көмек бөліміне 9 адам жүгінген. Олардың төртеуі — бала, бесеуі — ересек адам. Дәрігерлер зардап шеккендердің кесілген және сыдырылған жарақаттар алғанын анықтады.
Еске салайық, биыл Францияда торнадодан 26 адам зардап шегіп, жүздеген үй қираған болатын.
