СҚО-да 100-ден аса мехбригада тасқынның салдарын жоюға қатысады
ПЕТРОПАВЛ. KAZINFORM – Солтүстік Қазақстан облысында тасқынның салдарын жоюға және жөндеуге келмейтін үйлерді бұзуға механикалық бригадалар құрылады.
СҚО әкімдігінің мәліметінше, өңір басшысы Ғауез Нұрмұхамбетовтің төрағалығымен су тасқынының зардаптарын жою жөнінде кеңес өтті. Қазір су тасқынынан зардап шеккен тұрғын үйлерді қалпына келтіру басты назарда. Осы мақсатта өңірдегі барлық ауданның әрқайсысынан 8 техника мен 5 механикалық бригада жасақталып, жөндеу-қалпына келтіру жұмыстары жүргізілмек.
Ойқала ауданында Петропавлда құрылған 30 бригада жұмыс істейді. Бұл ықшамауданды қалпына келтіруге сондай-ақ Ғ.Мүсірепов, Тайынша, Уәлиханов аудандарының бригадалары көмекке келмек.
Былғары зауыты кентін жөнге келтіруге 4 аудан бекітілді, олар: Есіл, Жамбыл, Шал ақын және Айыртау аудандары.
Заречный кентінде М.Жұмабаев, Тимирязев, Ақжар және Мамлют аудандарының механикалық бригадалары жұмыс істейді.
Ал Аққайың ауданының бригадасы Қызылжар ауданына көмекке жіберіледі.
Жалпы тасқынның салдарын жоюға облыстың түкпір-түкпірінен барлығы 100-ден аса мехбригада жұмылдырылады.
Жолдарды жөндеуге және су әкелген қоқыстан тазалауға 50 техникасы бар 8 жол-құрылыс ұйымы бекітілген, олар қажет болған жағдайда қалпына келтіру жұмыстарына да тартылмақ.
Облыс әкімі Ғауез Нұрмұхамбетов жауапты мемлекеттік органдарға қалпына келтіру жұмыстарына қажетті бригадалар мен техникаларды бөліп, жұмыстарды қысқа мерзімде жүргізуді тапсырды. Сондай-ақ аймақ басшысы құрылыс материалдарының бағасын жасанды түрде көтеруге жол берілмейтіндігін ескертті.
Су кеткесін, тез арада тұрғын үйлерді техникалық тексеру мен бағалауды жүргізу қажет, оның нәтижелері бойынша залалды өтеу туралы шешім қабылданбақ.
Сонымен қатар, бірінші көтергіш сорғы станциясын қалпына келтіру бойынша іс-шаралар жоспарын әзірлеу тапсырылды.
