СҚО-да әйелдің басқаруындағы көліктен 80 келі есірткі табылды
НҰР-СҰЛТАН. ҚазАқпарат – Солтүстік Қазақстан өңірінің құқыққорғаушылары «Жезқазған-Петропавл» трассасында әйел адамның көлігінен 80 келі есірткі тапты. Бұл туралы ҚР Ішкі істер министрлігі Есірткі бизнесіне қарсы күрес департаментінен мәлім етті, деп хабарлайды ҚазАқпарат тілшісі.
«21 шілдеде Солтүстік Қазақстан облысының есірткіге қарсы күрес полициясы «Жезқазған-Петропавл» тас жолында жедел-іздестіру іс-шараларын жүргізді. Оның барысында құқыққорғаушылар азаматша Т.-ның басқаруындағы, салонында жолаушы – азамат Т. отырған «NISSAN» маркалы автокөлігін тоқтатты. Автокөлікті тексеру барысында, багаж бөлімінде салмағы 80 келіден асатын марихуана салынған 4 полиэтилен қап және салмағы 88 грамдық гашиш салынған 4 орама табылып, алынды», - делінген департаменттің хабарламасында.
Ұсталған азамат Т. танысына (рөлдегі әйелге) Солтүстік Қазақстан облысынан бірнеше сөмкені өз үйіне апаруға көмектесуді сұрағанын айтып отыр.
«Қазіргі уақытта аталмыш факті бойынша ҚР Қылмыстық кодексінің 297-бабы 3-бөлігімен (Есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу) сотқа дейінгі тергеу амалдары жүргізіліп жатыр. Ұсталған азамат уақытша ұстау абақтысына қамалды», - делінген хабарламада.
