СҚО-да биыл мемлекеттік қызметтің сапасына қатысты 30-ға жуық тұрғын арызданды

ПЕТРОПАВЛ. KAZINFORM – Солтүстік Қазақстан облысында мамандар мемлекеттік қызмет алу барысында құқығыңыз бұзылса, қайда жүгінуге болатынын айтып берді.

ҚР Мемлекеттік қызмет істері агенттігінің СҚО бойынша департаменті басқармасының бас маманы Анар Батталбектің айтуынша, биыл тұрғындардан 26 өтініш түскен. 

- Олардың ішінен 13 өтініш иесінің уәжі расталды және барлық жағдайда азаматтардың құқықтары толық қалпына келтірілді.

Өтініштердің 12-сі «EgovKzBot2.0» Telegram-боты арқылы келіп түскен. Соның ішінде 10 өтініш бойынша құқық бұзушылық расталып, тиісті шаралар қабылданды, - дейді Анар Батталбек. 

Шілде айында Петропавл тұрғыны «Мемлекеттік тұрғын үй қорынан тұрғын үйлерді жекешелендіру» қызметін алу кезінде кедергілерге тап болып, Департаментке жүгінген. Маманның айтуынша, қ ағидаларға сәйкес, бұл қызмет 30 күнтізбелік күн ішінде көрсетілуі тиіс.

Алайда, қала әкімдігінің тұрғын үй-коммуналдық шаруашылық, жолаушылар көлігі және автомобиль жолдары бөлімі өтінімді белгіленген мерзімде қарамаған.

Жоспардан тыс тексеру нәтижесінде Департамент тұрғын үй комиссиясының отырысын өткізуде бастамашы болып, азаматтың заңды мүддесін қорғап шықты.

- Егер азамат мемлекеттік қызметті алу барысында құқықтарының бұзылғанын анықтаса, ең бастысы уақтылы хабарласу қажет. Бұл мәселені тез әрі тиімді шешуге мүмкіндік береді, - дейді Анар Батталбек.

Бұған дейін СҚО-да жарты жылда мемлекеттік қызмет заңнамасын бұзудың 500-ге жуық фактісі анықталғанын жазған едік.