СҚО-да биыл вейпке қатысты жеті қылмыстық іс қозғалды

ПЕТРОПАВЛ. KAZINFORM — Солтүстік Қазақстан облысында прокурорлар вейпке қатысты жауапкершілікті еске салды.

СҚО прокурорының аға көмекшісі Максим Доровиктің айтуынша, биыл өңірде жеті айда 7 қылмыстық іс тіркелген. Мәселен, Петропавл тұрғыны әлеуметтік желіде вейп сататыны туралы хабарландыру берген. Сот ер адамды 50 АЕК мөлшерінде, 200 мың теңге шамасында айыппұл төлеуге міндеттеді.

Маманның айтуынша, қоғамда вейпті темекінің қауіпсіз баламасы ретінде қабылдайтын қате ұғым қалыптасқан. Ол әсіресе жастар мен жасөспірімдер арасында сұранысқа ие. Осыған байланысты 2024 жылдан бастап ел бойынша вейптер мен олардың құрамдас бөліктерін өндіруге, әкелуге, сатуға және таратуға тыйым салынды.

— Қылмыстық жауапкершілік көзделген. ҚР Қылмыстық кодексінің 301-1-бабы бойынша 200 АЕК-ке дейін айыппұл немесе 200 сағатқа дейін қоғамдық жұмыс немесе 50 тәулікке дейін қамауға алу жазасы қарастырылған. Қылмыс қайталанған немесе ауыр жағдайда — мүлкін тәркілеумен 5 жылға дейін бас бостандығынан айыру көзделген, — дейді Максим Доровик.

СҚО прокурорының көмекшісі Марат Қазиевтің мәліметінше, 2025 жылғы 16 шілдеде қабылданған заңға сәйкес, енді сату немесе тарату мақсатында сақтау, жөнелту және тасымалдау фактілері үшін қылмыстық жауапкершілік бар. Бұл заң күшіне 60 күннен кейін енеді.

— Вейптер мен құрамында никотині бар шегілмейтін темекі бұйымдарының саудасы — жай құқық бұзушылық емес, қылмыстық әрекет. Заңды білмеу қылмыстық жауаптылықтан босатпайды және барлық заңсыз фактілер туралы құқық қорғау органдарына хабарлау қажет екенін ескертеміз, — дейді прокурорлар.

Естеріңізге салайық, елімізде шылым шегетіндер азайып, вейп пен электронды темекіге әуестенушілер саны артқанын жазған едік.