СҚО-да былтыр 5 мың нәресте туып, 6 мың адам қайтыс болды

ПЕТРОПАВЛ. KAZINFORM — Солтүстік Қазақстан облысының демографиялық ахуалы жайында Ұлттық статистика бюросының департаменті мәлім етті.

Ведомствоның есебінше, қазір өңірдегі халық саны 522,2 мың адам, оның 264 мың адам немесе 50,6% — ауылда тұрады.

— Былтырғы қаңтар-желтоқсан ішінде облыста 5112 нәресте туды. Олардың ішінде 2627-сі ұл бала және 2485-і — қыз бала. Облыс аудандары арасында бала туу көрсеткіші бойынша бірінші орында Уәлиханов ауданы, одан кейін Ақжар және Жамбыл ауданы алда келеді. Облыс бойынша ең төмен туу көрсеткіші Аққайың ауданында тіркелген. Ғ.Мүсірепов атындағы аудан мен Мамлют ауданы жа көш соңында келеді, — дейді департамент өкілдері.

Өткен жылдың қаңтар-желтоқсан аралығында облыста 6088 адам қайтыс болды. Халықтың негізгі өлім себептері арасында ең үлкен үлес — 20,6% жүйке жүйесінің ауруларына тиесілі, 16,5% — қан айналымы жүйесінің аурулары, 14,5% — тыныс алу органдарының аурулары, 9,3% — ас қорыту органдарының аурулары, 8,9% — обыр және 6,5% — жазатайым оқиғалар, улану мен жарақаттану алады.

Былтыр бір жыл ішінде 3027 неке тіркелсе, азаматтық хал актілерін тіркеу органдарының деректері бойынша 1496 жұп ажырасып кеткен. 

Бұған дейін СҚО-ға қоныс аударып, кейін көшіп кеткен тұрғын енді 5,2 млн теңгені үш ай ішінде қайтаратынын жазған едік.