СҚО-да К-700 аударылып тракторист көз жұмды

ПЕТРОПАВЛ. ҚазАқпарат – Солтүстік Қазақстан облысындағы шаруашылықтардың бірінде К-700 тракторы аударылып, салдарынан жұмысшы мерт болды, деп хабарлайды ҚазАқпарат тілшісі.

СҚО Полиция департаменті баспасөз қызметінің мәліметінше, оқыс оқиға Тайынша ауданы Қарағаш ауылында болған. Полиция бөлімшесіне хабар сағат 17.00 шамасында түседі. Елдімекен сыртындағы ЖШС-ның шөп қорасының аумағында К-700 тракторының жүргізушісі көлікті абайсызда аударып алған.

Оқиға орнына бірден жедел тергеу тобының мамандары аттанып, істің мән-жайын анықтады.

«Механизатор тракторымен сүрлем шөп шұңқырының қасында жұмыс істеп жатып, абайсызда оны аударып алған. Аударылған ауыр техника кабинасын жапырып тастаған. Кабинадан шығару кезінде 43 жастағы жүргізуші көз жұмды», - дейді полицейлер.

Бұл дерек Сотқа дейінгі тергеп-тексерудің бірыңғай тізіліміне «Еңбек қорғау ережелерінің бұзылуы» бабы бойынша енгізілді. Бірқатар тиісті сараптамалар жүргізілмек.