СҚО-да қалың қарда балық аулауға шыққан 6 адамға құтқарушылардың көмегі қажет болды
ПЕТРОПАВЛ. KAZINFORM – Солтүстік Қазақстан облысында балық аулауға барған шыққан адамдарға құтқарушылардың көмегі қажет болды.
СҚО Төтенше жағдайлар департаменті баспасөз қызметінің мәліметінше, Шал ақын ауданының құтқарушылары арнайы «ТРЭКОЛ» техникасымен оқиға орнына жедел жетіп, құтқару операциясын сәтті жүргізді. «Нива», «ВАЗ» және «Ауди» көлігін мінген 6 балықшы қарға кептеліп, өздігінен шыға алмаған.
- Сергеев су қоймасына балық аулауға барған едік. Қарға баттық. Өзіміз шықпақ болып едік, нәтиже болмады. Көмек дер кезінде жетіп, аман-есен алып шықты, - дейді балықшылар.
Құтқарылғандардың ешқайсысына медициналық көмек қажет болмады.
Бұған дейін СҚО-да көктемгі су тасқыны қарсаңында өзендерде мұз жару жұмысы басталғанын жазған едік. Жалпы, облыстың 7 ауданында 50-ден астам учаскеде жарылыс жұмыстары жоспарланған.
