СҚО-да күн күрт жылынып, көшелерден қар екі ауысыммен шығарылып жатыр
ПЕТРОПАВЛ. KAZINFORM – Қыс басталғалы Петропавл көшелерінен 800 мың текше метр қар шығарылды. Бұл жылдағы орташа көрсеткішпен бірдей.
Солтүстік Қазақстан облысында екінші күн жаңбыр жауып, ауа температурасы 0 градустан жоғарылады. Қар еріп жатыр. Үйлерге қызыл су кірмеуі үшін қазіргі уақытта елді мекендерден қар шығару жұмысы қызған.
Петропавл қалалық әкімдігінің мәліметінше, облыс орталығында бұл жұмысқа 170-тен астам арнайы техника жұмылдырылды. Атқарылып жатқан шаруа қатаң бақылауға алынған.
- Биыл қар былтырғыға қарағанда аз, дегенмен мәселе бар. Жеке секторда, көшелерде қар көп. Сондықтан қазір қар шығару жұмысы қызу жүріп жатыр. Өткен ғасырда салынған үйлердің кейбірінің іргетасы жерге кіріп кеткен. Мұндай үйлерге қандай жағдайда болмасын су кіреді. Сондықтан қазір қар шығарылып жатыр.
Қар қарқынды еріп жатыр. Қолда бар техниканың барлығы – экскаваторлар, грейдерлер, жүк көліктері қазір қар шығаруға жұмылдырылды, - дейді облыс әкімінің бірінші орынбасары Марат Тасмағанбетов.
Петропавлда кәріз желілерінің жалпы ұзындығы 235 км, оның 116 км — ашық. Қазіргі уақытта осы суағарлар да тазартылып жатыр. Соңғы жылдары облыс орталығында 40 шақырым жаңа кәріз желісі салынды. Былтыр «Бірлік» және «Ойқала» шағын аудандарында су ағызатын жыралар қазылды. Сонымен қатар, қала көшелерінде 22 шақырымға жуық кәріз жүйесін жөндеу және жаңарту жұмыстары жүргізілді.
Бұған дейін СҚО-да су тасқыны қаупін бақылау үшін дрондар қолданылатынын жазған едік.
