СҚО-да полицей көлік жүргізуші куәлігін сатқаны үшін ұсталды

ПЕТРОПАВЛ. ҚазАқпарат - СҚО ІІД Қызылжар ауданының ІІБ қызметкері лауазымын асыра пайдаланды деген күдікпен ұсталды. Бұл туралы СҚО бойынша сыбайлас жемқорлыққа қарсы қызметтің баспасөз қызметінен хабарлады.

«СҚО бойынша сыбайлас жемқорлыққа қарсы қызметі СҚО ІІД Қызылжар ауданының ІІБ қызметкеріне қатысты қылмыстық істі тергеп жатыр. Сотқа дейінгі тергеуде күдіктінің «В» санаты бойынша жалған жүргізуші куәлігін беріп, тапсырыс берушіден талап етілген ақшалай қаражатты және барлық қажетті құжаттардың көшірмелерін делдалы арқылы алғандығы анықталды», - делінген хабарламада.

Ол жол жүру ережесін білмейтін және көлік құралын басқаруда тәжірибесі жоқ тұлғаға «В» санаты бойынша жүргізуші куәлігін берген.

13 шілдеде күдікті ұсталды және Петропавл қаласының ІІБ уақытша ұстау оқшаулағышына қамауға алынды.