СҚО-да тұтынушы өтінішін елемеген компания 6,2 млн теңге айыппұл төледі

ПЕТРОПАВЛ. KAZINFORM – Солтүстік Қазақстан облысында тұрғынның өтінішінен кейін электрмен қамтушы компанияға әкімшілік жаза қолданылды.

«Севказэнергосбыт» ЖШС тұтынушыға көрсетілген қызметтер туралы мәліметтерді беруден бас тартқан.

ҚР Ұлттық экономика министрлігі Табиғи монополияларды реттеу комитетінің мәліметінше, ведомствоның СҚО бойынша департаментінің атына тұтынушының өтініші келіп түсті. Тексеру кезінде «Севказэнергосбыт» ЖШС-нің өтініш берушіге реттеліп көрсетілетін қызметтер туралы сұрауға ақпарат ұсынбағаны анықталған. Бұл «Табиғи монополиялар туралы» Қазақстан Республикасы Заңының 26-бабы 2-тармағының 12) тармақшасын бұзу болып есептеледі.

Осыған байланысты, «Севказэнергосбыт» ЖШС Қазақстан Республикасының Әкімшілік құқық бұзушылық туралы Кодексінің 164-бабының 4-бөлігі бойынша әкімшілік жауапкершілікке тартылып, компанияға 6 291 200 теңге мөлшерінде айыппұл салынды.

Бұған дейін СҚО-ның энергетикалық кәсіпорындарына 550 маман жетіспейтінін жазған едік.