СҚО-да жалақы бойынша 40 кәсiпорында 154,6 млн. теңге қарыз жиналды

АСТАНА. ҚазАқпарат - СҚО-ның үш ауданы еңбекақы қарызы бойынша алда тұр. Бұл туралы Солтүстік Қазақстан облысы әкiмi Самат Ескендiровтiң төрағалығымен еңбекақы қарызын өтеу жөнiндегi дағдарысқа қарсы штабтың отырысында хабарланды.

Мемлекеттiк еңбек инспекциясы басқармасының басшысы Амантай Сейфуллиннiң айтуынша, облыстағы 40 кәсiпорында 154,6 млн. теңге қарыз жиналған. Бұл көрсеткiш бойынша Ақжар (29,5 млн.), Айыртау (27,7 млн.), Мағжан Жұмабаев (23,1 млн.) аудандары алда келедi. Өңiр басшысы берешекке батқан аудандардың әкiмдерiн қатаң сынға алды.

Отырыс соңында облыс әкiмi аудан әкiмдерiне еңбекақы қарызын өтеу бойынша шұғыл шараларды қолға алуды тапсырды.

«Кәсiпорын басшылары да тиiстi қаражаттарды iздестiрiп, бұдан әрi мұндай жағдайды болдырмауға жұмыс жасау керек. Бұл тапсырмалардың орындалуын облыс әкiмiнiң бiрiншi орынбасары Айдарбек Сапаров қадағалайды»,- делінген облыс әкімдігі мәліметінде.