СҚО-да жол-көлік апатынан 4 адам мерт болды
СҚО полиция департаменті баспасөз қызметінің мәліметінше, жол-көлік оқиғасы бүгін сағат 6:00 шамасында «Астана-Петропавл» автожолының 384-шақырымында болған. Петропавлдың 51 жастағы тұрғыны «Toyota Land Cruiser Prado» көлігімен Көкшетау қаласы жақтан келе жатқан. Ал, 51 жастағы және бір петропавлдық тіркемесі бар «Audi 100» автокөлігімен облыс орталығынан қарсы бағытта бет алған.
Жол-көлік оқиғасынан екі көліктің де жүргізушісі, «Audi 100» автокөлігінің 51 және 40 жастағы жолаушылары – Петропавл тұрғындары қаза тапты.
Аталған факті ҚР Қылмыстық кодексі 345-бабының 4-бөлігі «Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы» бойынша Сотқа дейінгі тергеп-тексерулердің бірыңғай тізілімінде тіркелді.
Сараптамалар тағайындалды. Істің мән-жайын жан-жақты зерделеуге бағытталған тергеу әрекеттері жүргізіліп жатыр, олардың нәтижелері бойынша түпкілікті процессуалдық шешім қабылданады.
СҚО полицейлері кеше ғана күн райының бұзылуына байланысты жүргізушілер мен жаяу жүргіншілерге жолда сақ болуды ескерткен еді. Өңірде түнде ауа райы күрт суытып, бір күнде қыс түсті.