СҚО-дағы 200-дей ауылға су құбыры тартылмаған
ПЕТРОПАВЛ. KAZINFORM – Солтүстік Қазақстан облысы халқын сапалы ауыз сумен қамтамасыз етуде шешімін күткен мәселе бар. Өңірдің 42,5 мың тұрғыны суды тасып ішуге немесе жергілікті су көздерін пайдалануға мәжбүр.
СҚО прокуратурасында заңдылықты, құқық тәртібін және қылмысқа қарсы күресті қамтамасыз ету жөніндегі үйлестіру кеңесінің отырысы өтті. Қаралған мәселелердің бірі – өңір халқын ауыз сумен қамту жағдайы.
Жиында белгілі болғандай, өңірдегі 42,5 мың тұрғыны бар 202 ауылда су құбыры жоқ, облыстағы бар су құбыры 35% тозған. Соның ішінде Петропавлда су беру желісі 58%, Ақжар ауданында 49% және Аққайың ауданында 43% ескірген.
Прокурорлардың айтуынша, сумен жабдықтаудың жекелеген көздері иесіз тұр, кейбірі санитарлық нормаларға сәйкес келмейді, суды тұтынуға бекітілген тарифтер жоқ. Сондай-ақ кей су беру нысандары сапасыз салынған, не болмаса жөнделген, кейбірінде қалпына келтіру ұзаққа созылып кеткен.
Ауыз суды тұтынуды есепке алу қажеттілігі де жиында баса назар аударылады.
Талқылау қорытындысы бойынша жергілікті атқарушы органдарға, табиғи монополиялар субъектілеріне және санитариялық-эпидемиологиялық қызмет органдарына жағдайды жақсарту және облыстың әрбір тұрғынын сумен қамтамасыз ету бойынша ұсыныстар берілді.
Бұған дейін СҚО-да бидайдың элеваторларға сыймай жатқандығын жазған едік.
