СҚО-дағы Сергеевка су қоймасында су деңгейі былтырғыдан 86 см артық

ПЕТРОПАВЛ. KAZINFORM – Солтүстік Қазақстан облысындағы бақылау пункттері қар жамылғысын жиі бақылауға көшті.

«Қазгидромет» РМК СҚО филиалының мәліметінше, соңғы мониторинг 15 ақпанда жүргізілді. Қазір облыс бойынша қар жамылғысының орташа биіктігі 9-40 см шамасында, бұл - облыстың көп бөлігінде нормаға жақын. Уәлиханов және Ғ. Мүсірепов атындағы аудандарда, Шал ақын ауданында қар қалыңдығы нормадан 10-21 см асады.

СҚО аумағы бойынша қардағы су қоры 18-ден 100 мм-ге дейін, облыстың көп бөлігінде орташа көпжылдық мәндерге жақын, норма 33-70 мм.

Ал өңірдің оңтүстік-шығыс және оңтүстік-батыс бөліктерінде қардың сумен қанығуы нормадан 40-75% артық.

Биыл өзендер мен көлдерде су мол. Мәселен Сергеев су қоймасындағы су деңгейі 802см жеткен, бұл өткен жылғы мәндерден 86 см артық. Су қоймасы 101% толған.

Петропавл маңындағы Есіл өзенінде су деңгейі 265 см, бұл 2024 жылдан 22 см-ге артық.

Мұздың қалыңдығы Есіл өзенінің салаларында 16-дан 80 см-ге дейін, Есіл өзенінде 25-тен 68 см-ге дейін жетті. Былтыр осы кезде мұздың қалыңдығы салаларында 14-62 см болса, Есіл өзенінде 34 см жоғары тіркелген еді.

Алдағы күндері СҚО аумағына циклон әсер етеді. Салдарынан желдің екпіні 15-20 м/с дейін күшейіп, боран тұрмақ. Ауа температурасы күндіз -3-8 градус аяз, түнде сынап бағанасы -8-13 градусқа дейін төмендейді.

Бұған дейін СҚО Төтенше жағдайлар департаментінің бастығы Жомарт Асқаров өңірдің су тасқынына дайындығы туралы айтып берген еді.