СҚО-дан Эльвира Нұрғожина Қазақстан атынан Италиядағы «Fiestalonia» халықаралық конкурсында өнер көрсетеді (ФОТО)

ПЕТРОПАВЛ. ҚазАқпарат - Солтүстік Қазақстан облысның Қызылжар ауданынан Эльвира Нұрғожина осы жылғы сәуірде Қазақстан атынан Италияда өнер көрсетеді. Шетелдік әріптестерден ол Астанада өткен «Fiestalonia Kazahstan» халықаралық конкурсында жүлдегер болғаннан кейін шақырту алды.

Эльвира Нұрғожина Астанада қараша айында өткен «Fiestalonia Kazahstan» халықаралық конкурсында екінші дәрежелі дипломға ие болған еді. Онда Қазақстаннан, Ресейден, Испаниядан, Украинадан, Италиядан 86 әнші сынға түскен болатын. Эльвира танымал әнші Бейонсенің «Listen» композициясын орныдады.

Бұл оның алғашқы үлкен жеңісі, Эльвира бес жасынан бастап ән салады. Табысты өнері үшін ол шетелдік әріптестерден сәуірде Италияда өтетін халықаралық конкурсқа шақырту алды.

«Әрине, қиын болды, іріктеу өте тартысты болды. Бірақ та мен барлық күш-жігерімді және тәжірибемді ортаға салдым. Италияда орындау үшін қазақ әнін әзірлеп жатырмын. Халықаралық конкурста Қазақстанды лайықты танытып, көрермендерді біздің бай мәдениетімізбен таныстырмақпын», - деді ол.

Жас орындаушы негізінен эстрадалық-джаз жанрында өнер көрсетеді, ол Петропавлдағы өнер колледжін бітіріп, Алматыда жоғары музыкалық білім алды. Эльвира алдағы уақытта өз репертуарын жаңа композициялармен толықтырмақ. Әзірге ол ана тілінде, сондай-ақ, ағылшын, корей және француз тілдерінде шырқайды.