СҚО-ның өзен-көлдерінде мұз жару жұмыстары жүргізіліп жатыр
ПЕТРОПАВЛ. ҚазАқпарат – Солтүстік Қазақстан облысында көктемгі су тасқынының алдын алу мақсатында шағын өзендерде және көлдердеь мұз жару жұмыстары жүргізіліп жатыр, деп хабарлайды ҚазАқпарат тілшісі.
СҚО төтенше жағдайлар департаменті баспасөз қызметінің мәліметінше, өңірде өзен-көлдерде мұз жару жұмыстары 15 наурыз күні басталды. Уәлиханов ауданындағы Сілеті өзенінің сағасында мамандар жарылыс жұмыстарын жүргізді.
28 наурызда су тасқынының алдын алу мақсатында мамандар Гусаковка, Жақсы-Жалғызтау, Имантау елді мекендерінің жанында Бабық-Бұрлық, Қарасу өзендерінің арнасында және Иманту көлінде жұмыс істеді.
«Өзен-көлдердегі мұзды жару жұмыстарына жергілікті атқарушы органдардың өкілдері және СҚО ТЖД қызметкерлері қатысады. Ал жару жұмыстарын Көкшетау қаласының мамандандырылған ұйымы - «Көкше-БУР» ЖШС жүргізді. Су қоймаларындағы мұзды жару нәтижесінде кейін мұз кептелісі болмайды. Яғни су деңгейінің көтерілуіне жол бермейді», - дейді СҚО ТЖД алдын алу бөлімінің бастығы Сәкен Ағзамов.
Бұл күндері өзен-көлдерде барлығы 300 кг жарылғыш зат – петроген жарылды. Жұмыстар алдын ала келісілген уақытта кезең-кезеңмен 7 учаскеде жүргізілді.
Алдағы күндері Тайынша және Ғ.Мүсірепов аудандарының өзендерінде осындай жарылыс жұмыстарын жүргізу жоспарланған.
