СҚО прокурорлары алимент төлей алмай жүріп, құмар ойынға қомақты қаржы салғандарды анықтады

ПЕТРОПАВЛ. KAZINFORM - Солтүстік Қазақстан облысының прокуролары алиментті қасақана төлемеушілердің жасырын кірістерін анықтады.

СҚО прокуратурасы баспасөз қызметінің хабарлауынша, ҚР Бас прокуратурасының тапсырмасымен алимент төлемдері бойынша міндеттемелерді сақтау мәселесіне тексеру жүргізілді.

Алиментшілер балаларына көп миллиондық қарызы бар бола тұра, букмекерлік кеңселерде құмар ойындарға көп ақша салып, өз міндеттемелерін елемейтіні анықталды.

Мысалы, 4,7 млн теңге мөлшерінде алимент бойынша берешегі бар борышкер, бір жыл ішінде «1xBet» букмекерлік кеңсесіндегі өзінің аккаунтын жалпы сомасы 33,9 млн теңге траншпен толықтырып, көрсетілген кезеңде ұтыс нәтижесінде 14,8 млн теңге шығарған.

Сол сияқты, атқарушылық іс жүргізу бойынша тағы бір борышкер 1,8 млн теңге алиментін төлемей, екі жыл ішінде «Olimpbet» букмекерлік кеңсесінде 2,5 млн теңгеден айырылған.

6 борышкерге қатысты осындай фактілер анықталды.

«Борышкерлердің букмекерлік кеңселердегі операцияларының жалпы сомасы 56 млн теңгені құрады. Аталған фактілер бойынша ҚК-нің 139-бабы бойынша сотқа дейінгі тергеп-тексеру басталды, баптың санкциясы екі жылға дейін бас бостандығынан айыруды көздейді. Қылмыстық істерді облыс прокуратурасымен бақылауға алынды», - делінген хабарламада.

Осыған дейін прокурорлар жүргізген талдау нәтижесінде СҚО-ның алты ауданында қоқыс тарифі негізсіз көтерілгені анықталғанын жаздық.