СҚО тұрғынынан сирек кездесетін көне мылтық табылып, тәркіленді
ПЕТРОПАВЛ. KAZINFORM – Солтүстік Қазақстан облысының тұрғыны ескі кинолардан ғана көруге болатын мылтықты үйінде заңсыз сақтап келген.
СҚО полиция департаменті баспасөз қызметінің мәліметінше, тәртіп сақшылары «Мал ұрысы» жедел-профилактикалық іс-шарасы аясында Аққайың ауданында рейд жүргізген. Полицейлер ауыл тұрғынының үйген шөбінің арасынан тегіс ұңғылы тіркелмеген екі аңшы мылтығын тауып алды.
Олардың бірі бүгінде сирек кездесетін Бердан мылтығы болып шықты. Қарудың бұл түрін кеңестік кинофильмдерде партизандардың қолынан көруге болады. XIX ғасырда Бердан винтовкаларын әскерде қолданды. Кейін бұл винтовкалар Тула қару зауытында бытырамен атуға болатындай етіп зауыттық тәсілмен өзгертілді.
Сарапшылардың бағалауынша, аққайыңдық тұрғынның мылтығы 1935 жылға дейін жасап шығарылған.
Ер адам көне мылтықты арғы атасы пайдаланғанын айтты. Алайда отбасылық раритет қаруды тапсыруға тура келді. Бұдан бөлек, тіркелмеген мылтықты сақтағаны үшін әкімшілік жауапкершілікке тартылды.
Тәртіп сақшылары мұраға қалған қаруды тіркеуді немесе полицияға өз еркімен тапсыру керектігін еске салады.
11 наурызда басталған «Мал ұрысы» жедел-профилактикалық іс-шарасы барысында полицейлер СҚО-да заңсыз сақталған 15 дана қаруды тәркіледі.
Бұған дейін Шымкентте курьерден 1 килограмм есірткі табылғанын жаздық.
