СҚО жылда импорттан шамамен 65 млрд теңге жоғалтады
ПЕТРОПАВЛ. KAZINFORM – Солтүстік Қазақстан облысы өзін азық-түлікпен толық қамти алмай отыр. Астықты өңір саналатын аймақ қарақұмықтың 80 % шеттен сатып алады. Бұл туралы Петропавлда барлық деңгейдегі әкімдердің қатысуымен өткен жиында айтылды.
СҚО экономика басқармасының басшысы Қуанышбек Қалижановтың айтуынша, өңір жылда негізгі тауарларды шеттен сатып алу арқылы 65 млрд теңге шамасында қаржы жоғалтады.
«Мысалы, бүгінде облыс өзін құс етімен тек 46%, шұжық өнімдерімен 22%, сүзбемен 27%, қарақұмықпен тек 20% ғана қамтамасыз етеді.
Біз бірінші кезекте қажетті өнімнің 65 түрін зерттедік, оның 25-ін өзіміз өндіре аламыз. Яғни аудан-ауылдарда кәсіпкерліктің осы түрлері бос, айналысып, табысқа жетуге болады», - дейді Қуанышбек Қалижанов.
Осыған байланысты, басқарма басшысы аудан әкімдіктеріне әрбір ауылдың нарықтық әлеуетіне талдау жүргізуді ұсынды.
«Талдау барысында жергілікті халықтың нақты қандай тауар мен қызметке қажеттілігі; еңбек нарығы, яғни тұрғындардың жұмыспен қамтылу деңгейі, орташа кірісі; бәсекелестік - нарықта қандай өнімдер мен қызметтер ұсынылғаны; автожолдардың қолжетімділігі; өнімді өндіру мен сақтауға қажет энергетикалық ресурстардың болуы; халық саны, соның ішінде жасы мен әлеуметтік топтар анықталуы керек», - дейді Қуанышбек Қалижанов.
Маманның айтуынша, елді мекендерде кәсіпкерлікті дамытудың тиімді құралы ретінде «Ауыл аманаты» жобасын алуға болады.
«Жобаның артықшылығы - ауыл шаруашылығы кооперативтерін құру мүмкіндігі. Кәсіпкерліктің бұл нысаны ірі нарыққа шығуға, жалпы өндірістік шығындарды және тәуекелдерді азайтуға, бәсекеге қабілеттілікті арттыруға мүмкіндік береді. 2023 жылы іске қосылған жобаға қазір СҚО бойынша 92 ауыл қатысып жатыр. 1,8 млрд теңгеге 236 жоба қаржыландырылды, 249 жұмыс орны құрылды.
Осы 236 жобаның 136-сы мал шаруашылығын дамытуға бағытталған, соның ішінде 450 шақты ірі қара мал, 1,5 мың қой-ешкі, мыңнан астам жылқы, 1,5 мың тауық сатып алынды. Бұл кәсіпкерлікті дамытудың осы түріне бағытталған жобалардың 50% астамы. Алайда біз өңірдің қажеттілігін ескеріп, сол өнім түрлерін өзімізде шығаруымыз керек», - дейді басқарма басшысы.
Бұған дейін Петропавлда барлық деңгейдегі әкімдердің қатысуымен өткен іс-шарада нашақорлықпен күрес мәселесінің көтерілгенін жазған едік.
