СІМ Айгүл Сайлыбаеваның Германияда өлі табылғанын растады

АСТАНА. KAZINFORM –  Сыртқы істер министрлігі Германияда жоғалды делінген Қазақстан азаматшасы Айгүл Сайлыбаеваның өлі табылғанын растады.

«Германия қылмыстық полициясының Қазақстан Республикасының Франкфурттағы Бас консулдығына берген ақпаратына сәйкес, 16 маусымда Бенсхайм қаласының маңында әйелдің мәйіті табылды. Криминалистер сот-медициналық сараптама жүргізуде. Өз кезегінде, полицияның ауызша алдын ала берген ақпаратына сәйкес, сыртқы белгілері бойынша мәйіт ҚР азаматы Айгүл Сайлыбаева деп танылды», - деп жазылған ресми мәліметте.

Ведомствоның дерегі бойынша, марқұмның Германияда жүрген анасы мен ағасына барлық қажетті консулдық-құқықтық көмек көрсетілуде.

«ГФР құқық қорғау органдары тиісті тергеу шараларын жүргізіп жатыр. Бұл іс туралы өзге ақпарат тергеу мүдделері үшін жарияланбайды», - делінген СІМ таратқан ақпаратта.

Зорлықпен өлтірілген экс-судья Айгүл Сайлыбаеваның мәйіті Германиядан табылғанын жазған болатынбыз.