SMS арқылы зейнетке шығу: азаматтар нені білуі керек?

АСТАНА. KAZINFORM — 1 қыркүйектен бастап зейнетақы тағайындау рәсімі жеңілдейді. Жаңа жүйе қалай жұмыс істемек? Олқылықтар қалай реттеледі? Jibek Joly арнасының «Бүгін LIVE» бағдарламасына сұхбат берген әлеуметтік сала маманы осы сұрақтарға жауап берді.

– Енді зейнетақы төлемдерінің барлығы хабарлама арқылы келеді. Ол үшін ең әуелі телефон нөміріңізді e-gov жүйесінің деректер базасына енгізу керек. Деректер базасына енген кезде зейнетке шығатын азаматқа автоматты түрде SMS хабарлама келеді. Сол хабарламаға жауап беру арқылы өтінішті электронды түрде жіберуге болады, – дейді Арай Мұратқызы.

Маман зейнетақыға қалай өтініш беру керегін түсіндірді.

– Зейнетке шығу уақыты жақындаған кезде сізге автоматты түрде үш түрлі зейнетақыға – жасына, базалық және жинақтық зейнетақыларға өтініш жіберіледі. Сіз сол хабарламаға жауап беруіңіз керек. Өтінім жіберілгеннен кейін қандай да бір құжаттар жетіспесе, арнайы өңдеуші органдар сіздің құжаттарыңызды қайта сұратып, зейнетақыны тағайындауға үлес қосады, – дейді студия қонағы.

Әлеуметтік сала маманы ҚР азаматтығынан бас тартқандар мен қайтыс болғандардың қордағы қалған ақшасын қайтарып алуға болатынын айтты.

– ҚР азаматтығынан шығып кеткен немесе қайтыс болған жағдайда кез келген уақытта Бірыңғай жинақтаушы зейнетақы қоры (БЖЗҚ) арқылы өтініш жазып, зейнетақы жинағын алуға болады. Мысалы, қайтыс болған азаматтардың БЖЗҚ-дағы жинақтарын мұрагерлер сот шешімімен ала алады. Алты ай өткен соң, мұрагері қордағы қалған ақшаны шешіп алуға құқылы. Оған қоса, қайтыс болған адамды жерлеу үшін берілетін бір реттік жәрдемақы өмірден өткен адамның жинақтау қорынан төленеді. Бұл жәрдемақы адам қаза тапқаннан кейін үш күн ішінде тағайындалады, – дейді ол.

Автоматты түрде тағайындалған зейнетақы төлемінде қате кетсе, азамат қайтадан өтініш беріп, деректерін өзгерте алады. Ал жаңа жүйенің тиімділігі қандай?

– Қолданыстағы проактив жүйе өте тиімді. Зейнет жасына жақындаған азаматтар Халыққа қызмет көрсету орталығына барып, кезекке тұрып, құжат жинау үшін уақыт жоғалтпайды. Бұл жүйе жұмысты жеңілдетіп, өнімділікті арттырады, – дейді Арай Мұратқызы.

Маман қорға жиі түсетін шағымдарға да тоқталды.

– 1998 жылға дейін еңбек еткен азаматтардың еңбек өтілі мұрағатқа өтпегендіктен, шағым жиі түседі. Мұндай жағдайда азаматтар бұрын жұмыс істеген ұйымға барып, сотқа жүгініп, еңбек өтілін дәлелдей алады, – дейді спикер.