Софья Самоделкина Олимпиада жолдамасына қол жеткізді

АСТАНА. KAZINFORM — Еркін бағдарлама сайысында сынға түскен Софья Самоделкина жалпы жарыста 181.36 ұпай жинап, 14-орыннан көрінді. Нәтижесінде ол 2026 жылғы қысқы Олимпиадасына ресми түрде қатысуға мүмкіндік алды.

Қазақстандық мәнерлеп сырғанаушы Софья Самоделкина АҚШ-тың Бостон қаласында өтіп жатқан әлем чемпионатындағы өнерін аяқтады.

Еркін бағдарламада қазақстандық спортшы 117,78 ұпай жинады. Жалпы сомасы – 181,36 ұпай.

Нәтижесінде жарысты 14-орынмен аяқтады.

Жеңісті америкалық Алиса Лью (222,97) иеленді. Екінші орынға жапондық Каори Сакамото (217,98) тұрақтаса, үздік үштікті тағы бір жапондық спортшы Монэ Тиба (215,24) қорытындылады.

Айта кетейік, Софья Самоделкина 2026 жылғы Олимпиада ойындарына қатысу нормативін орындады. Ол үшін спортшы әлем чемпионатында топ-24 қатарына енуі қажет еді. Бұл көрсеткіштің ресми түрде расталуы кейінірек жарияланады.

Еске сала кетейік, бұған дейін Михаил Шайдоров үздік үштікке кіргенін жазған болатынбыз.