Солтүстік Қазақстанда антитеррористік заңнама бойынша 400-ден астам құқықбұзушылық тіркелген
ПЕТРОПАВЛ. ҚазАқпарат - Солтүстік Қазақстан облысының полициясы лаңкестікке қатысты 575 осал нысанды тексерді, деп хабарлайды «ҚазАқпарат» ХАА тілшісі СҚО ІІД баспасөз қызметіне сілтеме жасап.
Ол тізімге әкімшілік ғимараттар, стратегиялық нысандар, оқу ордалары, көліктік құрылыстар, мемлекеттік мекемелер және сауда-ойын-сауық орталықтары және т.б. енген. Әсіресе, халық көп жиналатын ғимараттарға ерекше назар аударылады.
2016 жылғы тексерістер қорытындысы бойынша, 400-ден астам құқықбұзушылық анықталды. Барлық фактілер бойынша, ҚР ӘҚБК 149-бабы - «Террористiк тұрғыдан осал объектiнiң терроризмге қарсы қорғалуын қамтамасыз ету және қауiпсiздiгiнiң тиiстi деңгейiн сақтау жөнiндегi мiндеттердi орындамау және (немесе) тиiсiнше орындамау» бойынша әкімшілік хаттамалар толтырылды. Ойын-сауық орталықтары, базарлар, сауда үйлері мен білім беру мекемелері әкімшілік жазаға тартылды.
Антитеррористік заңнаманы бұзғаны үшін 100-ден 1000 АЕК-ке дейін айыппұл қарастырылған. Құқықбұзушылықты жою жөніндегі ұйғарымды орындамау да әкімшілік жауапкершілікке әкеп соғады.
