Солтүстік Қазақстандағы Бугровое көлінде мөңке балығы қырылды
ПЕТРОПАВЛ. ҚазАқпарат – Солтүстік Қазақстан облысындағы Бугровое көлінде мөңке балығы қырылып қалды. Себебін анықтау үшін мамандар оқиға орнында жұмыс істеп жатыр, деп хабарлайды ҚазАқпарат тілшісі.
Мамандардың пайымдауынша, балықтардың қырылуына 2 фактор әсер етуі мүмкін.
«Соның бірі – көлдің қатуынан балықтарға ауа жетпеген. Екінші себебі – су құрамындағы тұз мөлшерінің шамадан тыс артуы. Қазір көл басында тиісті мемлекеттік органдардың қызметкерлері жұмыс істеп жатыр. Комиссия судың сынамасын және балықтың ұшасын алып зерттейді», - дейді СҚО Табиғи ресурстар және табиғатты пайдалануды реттеу басқармасының қызметкерлері.
Айта кетейік, Қызылжар ауданында орналасқан Бугровое көлінің аумағы - 69 га. Су қоймасының тереңдігі - шамамен 1,5 метр. Негізінен мөңке балығы мекендейді. Елді мекен маңында орналасқанымен, көл жалға берілмеген, резервте тұр.
Еске салсақ, Шығыс Қазақстанда тоған балығы жаппай қырылған еді.
