Солтүстік Корея мемлекеттік туын өзгертті
АСТАНА. KAZINFORM — КХДР 1948 жылы құрылғаннан бері алғаш рет мемлекеттік туының пішінін өзгертті, деп хабарлайды Yonhap.
Солтүстік Корея Конституцияға өзгеріс енгізу арқылы мемлекеттік туының өлшемін өзгертті. Жаңа нормаға сәйкес, тудың биіктігі мен енінің арақатынасы бұрынғы 1:2-ден 1:1,65-ке ауысты.
Тудың өлшемі өзгергенімен, жалпы дизайны сол күйінде қалды. Оның ортасында жалпақ қызыл жолақ, жоғарғы және төменгі бөлігінде жіңішке ақ жолақтар, екі шетінде көк жолақтар орналасқан. Сондай-ақ ақ шеңбердің ішінде қызыл бес бұрышты жұлдыз бейнеленген.
Бұл өзгеріс Солтүстік Корея басшысы Ким Чен Ынның өзіндік басқару стилін қалыптастырып, ұлттық бірегейлікті нығайтуға ұмтылысымен тұспа-тұс келді.
Еске сала кетейік, мамыр айында Солтүстік Корея билігі Конституцияға өзгерістер енгізіп, онда Оңтүстік Кореяның жеке мемлекет ретіндегі мәртебесін ресми түрде бекітті. Сондай-ақ Ким Чен Ынның мәртебесін көтерді.
Сонымен қатар бұған дейін Түркі мемлекеттері ұйымы (ТМҰ) өз туын ғарышқа жіберетіні хабарланған болатын.
