Солтүстік Корея тағы да жаңа зымыран ұшырды
АСТАНА. KAZINFORM — Оңтүстік Кореяның Біріккен штаб бастықтары комитетінің мәліметі бойынша, Солтүстік Корея сәрсенбіде Жапон теңізіне қарай бірнеше зымыран ұшырды. Бұл шамамен он қысқа қашықтыққа ұшатын баллистикалық зымыран ұшырылғаннан кейін бірнеше күн өткен соң болды. Бұл туралы Yonhap хабарлады.
— Біздің қарулы күштеріміз Оңтүстік Корея мен АҚШ бірлескен қорғаныс стратегиясының аясында Солтүстік Кореяның әр қозғалысын жіті бақылап отыр және кез келген арандатушылыққа батыл жауап беруге дайын және оған толық мүмкіндігі бар, — делінген Біріккен штаб бастықтары комитетінің хабарламасында.
Біріккен комитет қазіргі уақытта ұшырылған зымырандар жайлы мәліметтер егжей-тегжейлі талданып жатқанын, бірақ Солтүстік Кореяның бір уақытта бірнеше түрлі зымыран ұшыруы мүмкіндігін ескеретінін мәлімдеді.
Өткен аптада Солтүстік Корея Жапон теңізіне қарай қысқа қашықтыққа ұшатын онға жуық баллистикалық зымыран ұшырған еді.
Солтүстік Кореяның мемлекеттік БАҚ-тары Пхеньян сенбі күні тактикалық баллистикалық зымырандарға орнатуға болатын кассеталық бомбаны да сынақтан өткізгенін хабарлаған. Оңтүстік Корея әскерилері бұл сынақ туралы ешқандай ақпарат жарияламады.
Бұл оқиғалар Оңтүстік Корея Солтүстік Кореяға шекараны демаркациялау бойынша келіспеушіліктерді шешу үшін әскери келіссөз жүргізуді ұсынғаннан кейін болып отыр. 21 қыркүйекте шекарадағы мина жарылып, Оңтүстік Кореяның үш әскери қызметшісі жарақат алған соң, екі ел арасындағы шиеленіс ушыға түскен.
Оңтүстік Корея тарапы Солтүстік Кореяның әскери-демаркация сызығын бұзуы мүмкін деген учаскені тексеріп жатқан кезде мина жарылған. Пхеньян бұған дейін шекара қорғанысын күшейтіп, тосқауылдар салған және миналар қойған болатын.
Солтүстік Корея оқиғаға қатысы барын жоққа шығарды. Пхеньян Сеулді жауапкершілікті Солтүстік Корея басшылығына аударуға тырысты деп айыптады және қару қолданамыз, шекара бойындағы дауыс зорайтқыштар арқылы Оңтүстік Кореяға қарсы үгіт-насихат хабарламаларын таратуды қайта бастаймыз деп сес көрсеткен.
Бұған дейін Ким Чен Ын КХДР әскерін соғысқа толық дайын болуға шақырған.
