Солтүстік Кореяның 20 теңізшісі Қытай аумағында кеме апатынан қаза тапқан
АСТАНА. KAZINFORM — Қытай кемесімен соқтығысқан Солтүстік Кореянің жүк кемесі суға батып, 20-ға жуық теңізші қаза тапқан. Бұл туралы Liahe Zaobao басылымы хабарлады.
Белгілі болғандай, кеме апаты Корей түбегінің батысындағы теңіз айдынында тіркелген. Солтүстік Кореяға тиесілі көмір тасушы кеме Қытайдың жүк кемесімен соқтығысып, суға батып кеткен. Салдарынан 20-ға жуық солтүстіккореялық теңізші қаза тапқан. Алайда, Қытай мен Солтүстік Корея билігі тиісті ақпаратты жасырып қалған.
Басылымның жазуынша, ақпан айының соңына қарай автоматтандырылған сәйкестендіру жүйесі (AIS) өшірілген солтүстіккореялық жүк кемесі Қытай портының маңында суға батқан. Қытайдың тиісті ұйымдары көмек көрсеткенімен, экипаж мүшелерін аман алып қалу мүмкін болмаған. Қытай кемесіне ауыр зақым келмеген.
Солтүстік Кореяның көмір экспорттауы БҰҰ Қауіпсіздік Кеңесінің 2371-ші қарарына қайшы. Айтылуынша, апат болған теңіз аймағы заңсыз көмір тасымалын ұйымдастыратын солтүстіккореялық жүк кемелері жиі пайдаланатын бағыт екен.
Белгілі болғандай, оқиға кезінде теңіз айдынын соқыр тұман басқан. Қытай кемесі санкциядан жалтару мақсатында AIS жүйесін өшіріп тастаған жүк кемесін дер кезінде байқамай, бүйірінен киліккен болуы мүмкін. Айтылуынша, кеме бортындағы көмір мен өзге жүк түгелімен теңізге батып кеткен.
Ақпарат көзінің айтуынша, апат туралы мәліметтің жария болуы Солтүстік Кореяға тиімсіз, Қытай тарапы да БҰҰ санкциясының бұзылуына көз жұма қарағаны үшін халықаралық қоғамдастықтың сынына ұшырауы мүмкін. Осы себепті екі тарап та оқиға туралы ақпаратты жасырып қалуға тырысқан болуы ықтимал.
Бұған дейін, 2017 жылдың наурыз айында Қытайдың оңтүстік-шығысындағы Цзянсу провинциясы маңында да Солтүстік Кореяның жүк кемесі Қытай кемесімен соқтығысып, суға батқан болатын.
