Соңғы бес жылда Ертіс орманының 2 мың текше метрі оталып кеткен
ПАВЛОДАР. KAZINFORM — Табиғатқа келтірілген шығын 65 млн теңгеге бағаланып отыр.
Сыбайлас жемқорлыққа қарсы іс-қимыл агенттігінің Павлодар облысы бойынша департаменті орман қорғау саласындағы сыбайлас жемқорлық тәуекелдерінің сыртқы талдауын жасады.
Талдау көрсеткендей, орман қорғау мекемелері қызметінің барлық сатысында жемқорлық тәуекелдері байқалған. Жағымсыз фактор саладағы ұйымдастырушылық-басқарудан бастап ағаш тұтынушылармен байланысқа дейінгі сатыларда анықталған.
— Павлодар облысының ормандары заңыз кесіліп жатыр. Мұны қолымыздағы статистикалық деректер растайды. Соңғы бес жылда орман қорының 2 мың текші метр көлемі жойылып, 216 заңсыз жағдай тіркелді. Келтірілген шығын 65 млн теңгеге бағаланып отыр. Мәселен, былтыр құрамында «Ертіс орманы» резерватының басшылығы болған ұйымдасқан қылмыстық топтың жұмысы тоқтатылды. Қылмыстық іс сотта қаралып жатыр. Бұған қоса, резерваттың Шалдай филиалында жиынтық құны 12 млн теңгеге бағаланатын қарағай тұқымының жетіспеушілігі анықталды. Қазіргі уақытта тұқым резерваттың балансына қайтарылды, — дейді Сыбайлас жемқорлыққа қарсы іс-қимыл агенттігінің Павлодар облысы бойынша департаменті басшысының бірінші орынбасары Әсет Оспанов.
Аймақтағы орман ресурстарын қалпына келтіру маңызды мәселе болып отыр. Көшет пен тұқым материалдарының тапшылығы орманды қалпына келтіру жұмыстарына қосымша сатып алулар ұйымдастыруды талап етеді.
Алайда бюджет шығындарын алдын-ала болжау тендерлерде жемқорлық қаупін арттыратыны байқалады. Әсіресе көшеттерді сатып алу барысында бұл құбылыс жиі бой көрсетіп қалып отыр. Бақылаудың жеткіліксіздігі қаржының ұрлануына және сатып алу үдерісіндегі айла-шарғыларға қолайлы жағдай тудырып отырғанға ұқсайды.
Сыбайлас жемқорлыққа қарсы қызмет ерекше қорғалатын табиғи аумақтардағы жемқорлық тәуекелдерін сыртқы талдау қорытындысы бойынша 35 ұсыныс енгізген. Оның үшеуі орындалса, өзгесі іске асу кезеңінде.
Еске сала кетейік, Ертіс орманын отап сатқан бас директор 150 млн теңге залал әкелген.
Орман шаруашылығы және жануарлар дүниесі комитеті «Ертіс орманында» 2029 жылға дейін ағаш кесуге тыйым салды.
