Сотталғандарды азаптады деп айыпталған түрменің 12 қызметкеріне қатысты үкім шықты
АСТАНА. KAZINFORM — Ақмола облысының мамандандырылған ауданаралық қылмыстық істер жөніндегі сот алқабилердің қатысуымен қылмыстық-атқару жүйесі комитетінің 12 қызметкеріне қатысты қылмыстық іс қарады.
Қылмыстық қудалау органы ҚАЖК қызметкерлерін Атбасар қаласының мекемесінде жазасын өтеп жатқан сотталған адамдарға әсер етудің рұқсат етілмеген әдістерін қолданды деп айыптады (Қылмыстық Кодексінің 146-бабы 3-бөлігінің 1-тармағы).
— Алқабилер сотымен іс қаралғанда қылмыс оқиғасының болуы, сотталушылардың кінәсі туралы шешім дауыс беру арқылы қабылданады. 10 алқаби мен 1 судьяның әрқайсысы бір дауысқа ие. Дауыс берудің артықшылығы жоқ. Кеңесу бөлмесінде дауыс беру нәтижелері бойынша алқабилер көпшілік дауыспен сотталушылардың кінәсіздігі туралы шешім шығарды, — делінген хабарламада.
Осылайша алқабилердің шешімімен 12 сотталушы ақталды. Сот үкімі заңды күшіне енген жоқ.
Еске салсақ, ҚАЖК қызметкерлері 2023 жылдың қыркүйегінде ұсталған болатын.
Бұған дейін Сот Алматы облысындағы түрменің бұрынғы бастығына үкім кескенін жаздық.
